lundi 5 novembre 2012

ضربني إب وشو على إيدي




طلع علينا في فيديو تبريري أخ راس بڨاري يقول بعظمة لسانو بما معناه راه بهيم و أطراف وذنيه ما يعرفهمش وين.. عندو ملكة البهامة و التبوڨير يعني.. 

مسكين، مهووس بنظرية المؤامرة إلى درجة إنو شك في روحو،.. خير كي ما قالش خدروني و حطولي puce électronique في طاسة مخي خكات في بلاصتي.. و إلا باهي كي ما قالش الشيطان أجرى الخطيئة على لساني كيما فسر النائب السلفي في برلمان مصر "أنور البلكيمي" (عمل عملية تجميلية على خشمو الكبير، و كي خاف من فضيحة خشمو بالفاصمة عمل فيديو فيسبوك يبكي و يقول ضربوه و جرحوه و ركّب فيلم متع مطاردة بالسيارات و 160 كم/س و تفاصيل مدهشة .. و كي تكشف رصاتلو يعتذر و يقول كنت غايب على وعيي و الشيطان أجرى الخطيئة على لساني و هذا قضاء و قدر و هي سادسة أركان الإيمان) .. و شوف حكمة ربنا يا مسلم، صديقنا متع التونسية إلي مسح مسؤليتو من الفيلم متع الكفن (علاه جايب كفن يا روح ماماتك ؟) يشبه خلقيا بصفة غريبة للبلكيمي، بصلة محلّفة و تقسمت على ثنين و يخلق مالشبه أربعين.. و تو فرضا السلفيين تبعوك و سمعوك، تقلنا قضاء و قدر زادة و مسؤليتك ما ثمش ؟  

و تعليقا على لب الكلام، فرضا إنو صحافي التونسية قلو "هاو عدوكم لعريض" ، صحيح طريقة غير أخلاقية في تنطيح الأكباش، إنما طريقة معمولة بيها في التلفزة و هي إلي تجيب ال show و تعمل ال BUZZ، و نحن نحب الTV من ها الفازات من حيث لا نعلم، و رينا الممارسات هاذي كي جابو هاك الكبش النطاح البحري الجلاصي في عديد القنوات، و ملك الممارسة هاذي هو صحافي الجزيرة فيصل القاسم في برنامج الإتجاه المعاكس (كي يبدى ضيف عاقل مش محفلها عياط، يعمل المستحيل بش يسخنو) و كل ضيف يتجاوز الحدود يكون ذلك على مسؤليتو الجزائية خاطر الضيوف بالغين سن الرشد، و فيهم إلي جرجروا بعضهم للمحاكم.. لذا تعلم المسؤلية يا راس البڨاري و حكاية: ضربني إب وشو على إيدي ما تقضيش.. 


dimanche 13 novembre 2011

قدّاش نومرو صباتك سعاد: نلبس 44 و دايور نحب فعل الخير و ما نزنيش


القذافي، يرحمو بهبالو كيما تقول جدتي، قال مرة على أوباما أبو عمامة، إنو المستبشرين برئيس أسود سيفاجئون أنو سيكون أبيض من البيض، و فعلا التاريخ سجّلّو كونو أوّل رئيس أمريكي كحلوش يقصف القارّة الكحلوشة .. السيدة سعاد الرهدانة إلي تخدم فارماسيان في الصباح و في الليل طمّانة (تعريف مصطلح طمّانة : هي البلندة المتبرجة، التي في جيدها حبل فيه بوندونتيف منقوش عليه: هنا تطمينات على حقوق المرأة) كانت نهضاوية أكثر مالنهضاويين، حتى الغنوشي تنجم تتعدالو على مشاعرو الحداثية بموقفها..

تذكير: الموضوع المطروح كان: مرا جابت صغير و هي عزباء و حطّتك أمام الأمر الواقع، شنوة موقف المشرّع؟ البلُندة المستقلّة متاع النهضة إلي ما تنتميش لحركة النهضة آما تشتغل عندهم طمّانة شعب "آ تون برتيال" (a temps partiel)، جاوبتها لا ما نحكيوش في الموضوع، المحاورة تقلها يا بنتي كيفاش نتعاملو قانونيا مع ها الحالات الإجتماعية، و لُخرى تسخايب روحها في قناة الرحمة في حصّة من سيسكب أكثر دموع و شكون شريفة بنت الفاضل على أختها،.. 
ضيّعت وقت مداخلتها الكل في هل ترضاه لأمك، هل ترضاه لأختك، و التونسية ديامنطة مش كي بنات البرّة.. و زادت قالتلها نحشم إنو تونسية تتكلم بهذه الطريقة، تقول لخرى آش قالت مسكينة.. ستَر ربّي حاصيلو ما قلتلهاش يا سحاقية يا بنت الماسونية يلي تحب تنتشر الفاحشة بين المؤمنين،.. 

المزايدات مترسخة في الخطاب النهضاوي، كي يحكيو على التطمينات يزايدوا و كي يحكيو على الأخلاق الحميدة يزايدوا، سعاد لا تفقه الفرق بين الخطب الأخلاقية و التعامل القانوني اللذي يقدم آليات تتفاعل مع أرض الواقع، الناس هاذم قادرين انهم يعاودو يجبدو من جديد النقاش العقيم حول هل يجب إستعمال واقي ذكري أو ذلك تشجيع على الزنا،.. و بالمناسبة نحب نعرف هل عندما ترتزق السيدة هاذي ببيع موانع الحمل، هل تحط الأموال في الكاسة ديراكت ولا تسأل: لشكون و لطفلة صبيّة ولا لمرتك، ولّا لا مزايدات في الأخلاق الحميدة مع الفلوس؟

يا مدام الأخلاق نعرفوها و كان تنقصك ولا حاجتك بدروس نعلّموك، و كل حد ما عليه كان يشرف تربية والديه،.. و ياما نساء عندهم ذكريات و دوسيات من قبيل الموضوع المطروح، مخبّين مثلا في صبيطار عزيزة عثمانة،.. و ربّي يبقّي السّتر على البنات لا تتجبد سِيرتهم في في الأنترنات,..

كي ندافعو على حق الماخور في الوجود ما يعنيش إنا من روّادو، إنت تعرف إلي روّادو من الطبقة الشغيلة و فيهم إلي صوتولكم، و المواخير هي دَفعة بلاء على بنات كان يمكن يُغتصبوا في الشارع،.. و كي ندافعو على حرّية الأنترنات ما يعنيش أننا من روّاد المواقع الإباحية و إنت تعلم إلي من سخرية القدر كونو المكبوتين مرتادي ها المواقع هوما نفسهم السكيزوفران المُنادين باغلاقها, و نذكر على سبيل المثال لا الحصر إنو تجارة الجنس (أفلام و أنترنات و إتصالات على الهواتف) تسجّل في أعلى ارقامها عالميا في الخليج العربي،... و معلوم إنو البشر متناقض، و آياتهم ملائكة في الجهر و أبالسة في الخلوة،.. و الأبالسة معروفين بالمزايدات و يلقاو ديما فلتات أُحادية لا يمتلكو سرّها سواهم و قدرة للخروج على الموضوع بش يفسّرو قداش هوما شُرفة، حتى في حورات من قبيل السؤال فيها يكون: قدّاش نومرو صباتك, ينجّمو يجاوبوا: نلبس 44 و دايور (d'ailleurs) نحب فعل الخير و ما نزنيش.. 

و يا مادام كيما تعرف، سيدك الشيخ ناوي يقوم بتحويرات في السياحة و جعلها متماشية مع التطلعات الخليجية،.. و في حالة ما فهمتش يا ديامنطة نوضّحلك، السياحة هاذي كما يعلم القاسي و الداني (و بالأخص إلي عاشرهم في لندن) سياحة جنسيّة، قعدات خمريّة و أجواء ألف ليلة و ليلة و نغمات عدويّة (ما تتفجعش، نحكي على المغني المصري, مش على زملائك في الجامعة كي كانوا يكنُوك رابعة العدوّية)، و برة عاد وقتها، لا عاد ديامنطة لا وذني، تولي قعدات خاصة بالضبط، و تتبدل اللغة و يتجبد الحديث على الجنس و الجواري و لا حياء في الدين و زواج المتعة و العرفي و زواج المسيار، و كلو من غير تقييد في البلدية، آما تو يصير في الوتلة في الليالي مع غض الطرف على العقود الممضات مع بزوغ الشمس أو مع صلات الصبح على أقصى تقدير،.. و تو يقلك الحرّة لا تعمل بثدييها، و إلي تحب تعمل ميسالش هوكي ماهيش مرا حرة و برة، هذا لنسانا المحليات، و يولي لبنات أوروبا الشرقية قيّد على التمتّع بكافرة و ممكن يتجبد فقه ملك اليمين..  


بالطبيعة نفدلك كي نقول تتبدّل اللغة، متوما من حزب "نقعد باهت كيفاش نطرحو ها المواضيع"، "لا ما نحكيوش، خلّينا ساكتين"، "الحديث ما عندوش مبرّر"، و سيكون موضوع السياحة الجنسية مسكوت عنو، و ما عليشي لغة من أصلو بش تتبدّل، و ذلك مراعات للطبيعة الديامنطية للمعنيات بالأمر.

نحب نضيف أنّي لم أكتب هذا المقال غيرة على كتبة الدستور و مستواهم و ما شابه من تلك الشعارات المتبكيّة على مصير الدستور من حارزات الحمام الحاصلين على شهائد دكتوراه كيف سيادتك، أنا أدرك أنك لن تكوني من كَتبة الدستور و ربما براءة خطابك الأبله القائل بكل تلقائية أنك لست أخصائية في الموضوع و أنك مجرد تافهة تتكلمين في شؤون العامة (برغم أن المواضيع حياتية عمومية، لا تحتمل كوجيتو عظيم لسبر مغاورها، فلقد كررت عشرات المرات أنك لا تفقهين حتى القليل تقريبا في كل المواضيع) لَخَير دليل لإدراكك أن دورك مبهم و غير محدّد المعاليم .. كَتبة الدستور هم تكنوقراطيّي من دفع 32 مليون دولار لدعم الديمقراطية في تونس، هؤلاء القوم معروف أنهم لا يشبعون و لا يدفعون من أجل سواد العيون، هم سيكتبون.. 

و أنت يا مدام سعاد دورك تشريف و ليس تكليف، و كثرة وجود أمثالك من عدم الأكفاء, أو الرويبضات (تعريف الرويبضة: هو التافه الذي يتحدّث في شؤون العامّة و هو "ما يعرفش", "ما يعرفش"، و هو الكاذب الذي يُصدَّق، و يقابلوا في الجهة الأخرى الصادق الذي يُكذّب،.. و سيادتك تعرف روحك فين، بالأخص كي تشوف وضعك اليوم، مُصدقّة و حاصلة على أكثر من 60000 صوت، ولّا نكذّبو الحديث؟) في المجلس التأسيسي من المشرّفين بحضورهم الرمزي ليس إلا دليل على أن دوركم سطحي تصويتي لا غير، و ليس بتكليف، و الدستور نعرفوه بش يتكتب حداثي بورقيبي و إلي تحبو متوما الكل، و متوما نجحتو فقط خاطر وضعتو نفسكم كورثة لمشروع الدستور البورقيبي و فصله الأول الشهير (مع تغيير الإسم وعدم الترحّم) و لن تطرحوا البديل الإسلامي،.. و هذا يعيبكم و لا يشرّفكم، و ها الأيام بيننا و العبرة بما سنرى من نتيجة، أنا أراهن أنّكم مساهمون في مسرحية لإخراج دستور بورقيبي الملامح, أو على أقصى تقدير، على يمينو ببضع صنتيمترات,  مكتوب من الدافعين لمساندة "الديمقرطية" و ستصوّتون عنه من حيث لا تعلمون و لو كنتم أصحاب مبدأ ستعترضون، و لن تعترضوا....

و من سخريّة القدر من أمثالكم عديمي المبادئ، أنكم ستتحفونا طوال فترة مداولات التأسيسي بمداخلات مضحكة فيها مزايدات إسلامية و معلّقات و ملاحم نضاليّة، و ستضعون بذلك أنفسكم موقف من يقول ما لا يفعل، و ليقفنّ الناضر للمنتوج الدستوري متعجبا في الأخير مسترجعا في مخيلته مسلسل زلعاتكم إلي سمعها بين التلفاز و موجات الأثير، و يدرك انكم لم تكونوا يوما معنيّين بعملية كتابة الدستور و إنو عروفاتكم الأمريكان ما عندهم حتى إحترام لحفض ماء وجهكم و لم يردّوكم عن تفاهة فعلكم, و تدركون عندها انكم كنتم قرود الشو (show)، مجرد ضاهرة صوتية.. و بالطبع سيتحفنا شيخكم المفدّى عالم السلطان الأمريكي بالتفسير الشرعي لشكل الدستور اللا إسلامي بأنه نتيجة سنة التّدافع، و أن تدافع المتداخلين في الحياة السياسية أدى إلى هذه النتيجة متناسيا أن له أكثر عدد المقاعد..

ملاحظة: لست من المدافعين على الدولة الإسلامية، إنما من المدافعين على الوضوح،.. 

ياخي مو كلّنا ماذابينا تكون الحياة في مدينة أفلاطون الفاضلة و الصغار الكلّ تولد في إطار زواج, آما هنا الحديث على أمر واقع و صاير في المجتمع، الصغير إلي يولد في إغتصاب ياخو لقب و إلي يولد من عزباء رقعة حداثية نقولولو ما نحكيوش في موضوعك؟ القانون متع الأمهات العازبات و كيفاش صغيرها ياخو اللقب و ما لها و ما عليها، موجود و مُفصّل، و تي القانون حكى ونتي ما تحكيش؟ لذلك يا مدام سيّب علينا من اللغة الخشبية و نحّي علينا الإجابات الركيكة على أبسط السؤالات و المزايدات إلي بش تتسجّلك كبهلوانيّات، كان جيت تقول و تفعل صحة و فرحة، أما إنت بش تقعد كي ليوم كي غدوة فخورة بجهلك و إب "ما تعرفش ما تعرفش" و ما يجيش نحكيو في الموضوع، ديجا بوجودكم في التأسيسي متكلّفين علينا مبالغ طائلة بش تكتبوا دستور نعرفوه مكتوب، في عوض ما توفرو المصروف لخلق مواطن شغل،.. مش مطلوب مالناس الكل بش تدرك إلي دورك كرتوني ولي النهضة لا عندها لا مشروع بديل متع شريعة لا وذني، فما ناس ما تعرفش و مفجوعة، لذا تذكر دورك في المسرحية، إنت "طمانة"، طمانة إب شهرية سوايع زايدة بخلاف الفارماسي، آش خير من ها الدوبل جوب؟  (Double Job) ، برشة شباب يحلمو بيها خدمتك.. 

قد يخيّل للبعض أني اتحامل على النهضة أو لي نظرة مؤامرتية، أجيب لا، أكرر أن هناك 32 مليون دولار دخلوا إلى تونس لدعم "الديمقراطية" و لست مخترع الخبر، و هاته الأموال لم تدخل في شكل ورقات نقدية في جيوب مسافرين، بل دخلت عبر قنوات بنكية معلومة الوجهة للسلط المختصة، إلا أنّ السلطات ترفض تنوير الرأي العام و الكشف عن منتفعيها، وحده الأحمق من يضن أن أمريكا ستصمت إن ضاع استثمار برقم مكّوكي بهذا الحجم، لم يضع الإستثمار: رويبضاتهم في المنابر و كتّابهم في المكاتب،.. 


jeudi 20 octobre 2011

سرّ الحمامة الزرڨة، مالكش ديمقراطية عندي













بعد الإنتخابات و نجاح النهضة، وقفو الشباب و راحوا لصاحب البرلمان بش ياخذوا حقوقهم، لقاو جماعة النهضة وجوههم كلها إيمان و منوّرة و حمامة زرڨة متع حرّية معلّقة في اللوڨو و وحدة أخرى في جبهتهم، السّبح مايد إن شاينا في يديهم ما شالله، و الذقون بين محلوقة و محفّفة، و مورو المستقلّ قاعد في الشيرة لخرى وجهو أبيض و مربرب، و يبشّر بالجنّة و يفرّق في النّوامر من نومرو حداش ونتي طالع،



 و في هذه الأجواء الشباب تكلّم: نحبّو شغل حرية و كرامة وطنية و مقومات الديمقراطية، قالولهم الشغل برّاو لمكتب تسجيل الهجرة في قطر، جيبو القشّ من تركيا و عنّا ليكم وعود من حلفائنا بش قريبا يحلّولكم لسوريا ممَرّ، ما فمّاش مشكل في التأشيرة المهم تعزمو عالسّفر،  برّاو أضربو المرمّة في ليبيا و شُقّو الحدود برّ برّ، و محلّيا عنّا ليكم 590000 موطن شغل و ما تسئلوناش تفاصيلهم كيفاش، عنا في اللوجيسيال خَور، إستنّاو نجيبولكم تفاصيلهم كي يفسرّوهملنا تكنوقراطيّي فريق السبسي و الفرنسيس و البنك العالمي و الأمريكان حلفاء السّمر..

و طفّاو الضو على الحرّية و الكرامة الوطنيّة خاطر مش وقتو،...  و الله أكبر.. مشاو يصلّيو في العصر أربع شهور،...

الشباب تغشّش و قالهم يا ولادي تي مو قلنا حرية و كرامة وطنية، قالولهم لا مش وقتو و الله أكبر قامت "صلات" الهوية، و مشاو يصليو جماعة وراء إمام بآيات أمريكية تلاوة قطرية.. (صلات تاء مفتوحة عمدا، و حاشى صلاة الإسلام)، و قعدو يصلّيو عامين،.... 

وتبدّلت مفاهيم الحرية، فكنت مثلا في نهار سعيد قبل ما تشد الثّنية، مع حلّان الوطنية تلقى أجواء ربوخ ديمقراطية: تلقى الأخت امال مثلوثي مرتدية كُم طويل، تغنّي في آنا احرار ما يخافوش أنا صوت الما رضخوش، آنا سّر الحمامة الزرڨاااا.. ، إلي عشقو زرڨتها سنين...


و بعد تعمل عفسة يا  راراي  يا  رارارم  يا  رارار... يا  راراي  يا  رارارم  يا  رارار ... 

و الملاحَظ إنّو النهضة أصحاب الوفاء كيما وعدو بعدم إجباريّة لبس الحجاب، كانوا وفيّن و على العهد، انّما إجتنابا لإستفزاز المشاعر كانت كل طفلة تفهم قدرها وحدها و تلبس على القليلة كُم طويل بالأخصّ بعد ما عدّاو في التلفزة  برامج حواريّة  تفسّر كيفاش إلّي عدم لبس الحجاب إختيار و من شاء أن يكفر فليكفر..

الشباب ستنّا ستنّا بعد حرنّلهم غادي و واحد قلّهم: لا عاوزين وعودنا احنا تو، شغل حرية كرامة وطنية و كل مقومات الديمقراطية، قام النور النهضاوي الأبيض ولّا أحمر عاطي على البنّي الخراوي، و الحمامة الزرڨة متع الحرية طارت، و جاوبو: انت مالكش ديمقراطية عندي..



مقاربة بين النهضة و ضاهرَتي العرّاف المرخّص له و علماء السلطان



هل إذا قلت أنّي ضد ضاهرة العرّاف المرخّص له، يمكن أن أُنعت بأني أريد مَحق الدجّالين؟ ...و شتّانا بين الطبيب المُعالج و العرّاف و إن رُخّص له،..

بالنّسبة لي، قيادات النهضة هم تجار دين، مشعوذون لا يلعبون السياسة المتعارف عليها، يبيعون الإسلام  و جعبتهم خالية من المشاريع، كل اقتراحاتهم أنهم "لن يغيرو" لا يطرحون حتى البديل الإسلامي، قدر الواحد فيهم من قدر عرّاف مرخّص له (هذا تحديد قيمة، و ليس استنقاص لبشر) يبيع منتوجو و يداوي فعليا إلّا إلّي يعقد النيّة و هنيئا للمعافى.. (و هم يتعافون فعلا)، هو سياسي مرخص له، و الرخصة ليست الضامن لكفاءة  المرخَّص له،..

النهضة هم دجّالو دين، هم علماء السلطان، و السلطان إسمو USA، هل رأيتم يوما عالم سلطان يخالف شرع الله؟ قطعا لا، يمكن أن يخرج عن الإجماع، دائما سيجد الدليل الشرعي لتثبيت ما يقول، النهضة ليس لها مشروع لأنها ببساطة غير قادرة على نهضة بلد (ليس لديها مقومات القوة و العلم) و ستبيع البلد، لذلك هي تبحث يمنة و يسرة عن المشتري، ستبيع ستبيع ستبيع..  

صحيح انو ما أقول ينطبق على أحزاب أخرى (ببساطة خاطر ما عناش مقومات قوة في تونس و برشة فيهم سبيعو)، و لكن غدوة تلقاو القوة لمجابهة حزب بائع بلد، و لكن ستكون مهمة مجابهة عالم السلطان الأمريكي أصعب، و تذكرو أن الجبالي قال ما يضاهي قولة "يحيا بيبي نتنياهو" وسط لا مبالاة من الرأي العام، علماء السلطان سيمرّرون ما يريدون و سيخدّروكم بالأدلة الشرعية،.. 

اجتنبوا السياسي المرخّص له على باطل كالتجمع، اجتنبو العراف المرخّص له كالنهضة، هذا ما انصح به و أرجو أن تحترمو رايي كان خالفتوه.. هيّئوا أسباب حقيقية للنهضة و لا تعقدو النيّة مع الدجّالة و مشعوذي السياسة.

lundi 10 octobre 2011

إلي شديتو من قضية نسمة


إلي شديتو من قضية نسمة، إنو الشعب مازال مقهور و مكبوت كيما في عهد بن علي و ما يواجهش القضايا مباشرة،.. أُقِرّ أن إستنكار العمل النسموي تجاوز دائرة المجموعة السلفية، و أُقِرّ إنو الإستنكار و حتى تطليع الكشاكش و المزايدت و الرّيا حرية شخصية، و كل حد عندو أسبابو، و لكن التونسي في حالتو العادية كي يستنكر لا يستنفر،.. القضية إنو كيما وقت بن علي التونسي يشوف في العوج و ساكت مقهور، و إجماعو الوطني ما جا كان على تعيين فوزي البنزرتي في المنتخب و يسب في الجامعة إلي ماهيش تحقق في "المطالب الشعبية"،

 ليوم كيف كيف، التونسي يشوف في العوج: إلي يشد قناص يجيبهولي، إنتخابات على التأسيسي ليس لأي مواطن أدنى فكرة على ما سيكون دور المنتخبين فيها، ما الفرق في الصلوحيات بين رئيس القائمة و أعضاء القائمة؟، من سيكتب ماذا في الدستور؟، ما هي حقوقي كمصوت، هل هناك نسبة مشاركة دنيا دونها تسقط نتائج الإنتخابات أم النتيجة تعتمد مهما كانت نسبة التصويت؟ أي على طريقة ميثاق ماستريتش إلي ينضم العلاقات في الإتحاد الأوروبي إلي صرح في شأنو أحد محرّريه الفرنسي الصهيوني جاك اتالي انهم تناسو عن قصد أي فصل أو بند يخوّل للأعضاء التراجع عن المسار المرسوم .. لا من مجيب على تساؤلات الشعب، و الأحزاب لا تطرح المشاكل الحقيقية من اصلو.... و "المطالب الشعبية" موجهة و مركزة نحو إخراس قناة أو زيد أو عمر، ...

نصحح مفهوم ذكرتو الفوق: "الشعب مقهور و مكبوت كيما في عهد بن علي"، الشعب "كابت روحو وحدو و قاهر روحو وحدو" كيما في عهد بن علي، واجهوا المشاكل الرئيسية،.. و تو تشوفو كي ياقع هذا، الناس ترتاح و المشاكل تاخذ شكل و حجم طبيعي، وليتو ما عادش نتفرجو على برامج الكورة ليوم ؟ ماو تتفرجو و لكن الكورة رجعت لحجمها الطبيعي.. الشعب التونسي ماهوش عزوزة شدت سارق و بركت غادي،.. الشعب التونسي شباب..


samedi 8 octobre 2011

إجابة على تدوينة وديازعن تحذير أمريكا رعاياها السفر إلى تونس



 نشرت مدونة Wediaz المعروفة بترويج أخبار تتراوح بين الكذب و الإثارة و أنصاف الحقائق في أحسن حالة، خبر عاجل و خطير مفاده أن الولايات المتحدة تحذر رعاياها من السفر إلى تونس، و طلع علينا شخص ثاني بهذا الفديو اللذي يدعم الخبر مفتخرا باتقانوا للإنجلزية و ربطها بسفر السبسي،
https://www.facebook.com/photo.php?v=161349863954799 
و بعد تثبت من الخبر و دخول لموقع الخارجية الأمركية،




 إتضح لي أن ليس هناك نسخة عربية للموقع، و أن الصورة التي نقلها هي ترجمة  لموقع الخارجية كما اقترحها عليه ال google Traductor, هناك مشكل رهيب و هو أن الترجمة الحرفية ل-google Traductor لا توصل المعنى، و ما زادني تأكد في سوء نية Wediaz هو أنه كان بالإمكان إيصال المعنى إذا  ترجم بقية الخبر و لو حرفيا و بإنجليزية ركيكة،
في صفحة الخارجية المختصة بالرحلات عندهم TRAVEL WARNING و TRAVEL ALERT ،

1- أما الأولى TRAVEL WARNING فتعني تحذيرات من السفر، و تخص البلدان إلي فيهم خطر داهم و لو كانوا من أصدقائهم، مثال: إسرائيل محذر من السفر إليها، و مساوى بينها و بين الضفة و غزة،
 و هنا قائمة كل البلدان المخصوصين بالتحذير، و هي طويلة و لا تضم تونس:

2- أما الثانية  TRAVEL ALERT : و تعني تنبيهات سفر، أي أن فيها طابع إعلامي كخدمة للمواطن الأمريكي كي لا يقصد مكان و هو ليس على علم بحدث اسثنائي في البلد، و حسب تعبير الموقع حرفيا فهذه الإستثنائات : تصدر لنشر المعلومات عن الظروف قصيرة الأجل ، سواء عبر الحدود أو داخل بلد معين ، التي تشكل مخاطر كبيرة على أمن المواطنين الأميركيين. الكوارث الطبيعية والهجمات الإرهابية ، والانقلابات ، ذكرى الأحداث الإرهابية ، والمظاهرات المتصلة بالانتخابات أو العنف ، والأحداث البارزة مثل المؤتمرات الدولية أو الإقليمية الأحداث الرياضية هي أمثلة على الظروف التي قد تولد تنبيه السفر.

و الملاحظ في الحالة التونسية أن هذا التحذير ليس حديث بل هو  تعويض لتحذير سابق بتاريخ 8 جويلية 2011, و هناك تحذيرات مماثلة في شأن مصر و اليابان (أحداث المفاعل النووي), و لا ننسى أن تونس معلنة لحالة الطوارئ لتاريخ غير محدد، أكيد أن الحالة الأمنية التونسية سيئة و لكن الخبر المنقول من WEDIAZ لا يعني أي طارئ جديد و هو خبر للإثارة، 


 الحكومة لو شاءت لأوقفت الخور، لأن لها الوصفة السحرية لإسترجاع الأمن و إيقاف حالة الطوارئ، ألا و 
هي القيام بدورها الأمني الثوري و هو الأصل و ليس الاسثناء، أي إيقاف جلادي العهد البائد و إيقاف من قنص شهداء الثورة، حتى يسترجع الشعب احترامه المؤسسة الأمنية، و تتمكن الأخيرة من العمل الفعال، و إيقاف تدفق السلاح مجهول المأتى لمصالح عناصر فساد متناحرة، و مما سيعجل بإنهاء حالة الطوارئ.  

و أخيرا أجيب أخونا الذي تثبت من الخبر و قال أنه يجيد الإنجليزية: دا إنجليزي دا يا مرسي؟  


jeudi 6 octobre 2011

ماني ناسي كبّولي ماء الفرق في عينيا





التدوينة هاذي إجابة للي يحاولوا يسوّقوا فكرة نهضة عشرة ملاين حبيناها، قالها نوفل الورتاني يفدلك، ياخي فما إلي خذاها بالجد، في البدأ اقترح تشغيل فيديو اغنية ماني ناسي للافريقي للمرافقة باللّحن،


 و بلوغة الكورة نقدملكم النهضة كما أراها:

عام ألفين قالو يا مولانا يا العالي يا الله انصر الماطري و هذاكا آش نتمنا يعني
 بقدرة ربي و حتى لآخر الدنيا درابو آل بعلول عالي و جامي يفنى،.. ماني ناسي عام ثمانين كبّولي ماء الفرق في عينيا، هدّولي حياتي فجّرولي الوِتلة تحت ساقيا، ماني ناسي عام ثمانين كبّولي ماء الفرق في عينيا، هدّولي حياتي فجّرولي الِوتلة تحت ساقيا، يا مولانا يا العالي يا الله طز في النهضة و هذاكا آش نتمنا، بقدرة ربي و حتى لآخر الدنيا درابو تونس عالي و جامي يفنى،.. ماني ناسي الجبالي قال صهيون مثال ديمقراطية،  تمهيد إل صلح الحديبيّة كي خواتهم في تركيّة، ماني ناسي مورو قال ما تعارضوني الجنة راهي ليا، و ثنيّتها مالدورة إلي ورا الزنڨة هاكيا، ماني ناسي بن سالم قال بورقيبة يهودي فمتا شنية، و أمير قطر بندر بندر وطنية، ماني ناسي قال دوعاجي و جماعة تحت السور كلوشرات و باندية، و غنوشي قال ولاد الجامعات يبيعو البلاد لولاد الأجنبية، ماني ناسي عام ثمانين كبّولي ماء الفرق في عينيا، حمادي الجبالي إستعرف  بهالقضيّة، ماني ناسي المنّاعي و العَمري كشفوا مسؤلي ثاني قضيّة، هدّولي حياتي فجّرولي الوِتلة تحت ساقيا،


بي آس: مانيش من محبي الكليب و مانيش مالعاصمة، و تحياتي لجمهورها